‎1 ‏מִי־זֶ֣ה׀ בָּ֣א מֵאֱד֗וֹם חֲמ֤וּץ בְּגָדִים֙ מִבָּצְרָ֔ה זֶ֚ה הָד֣וּר בִּלְבוּשׁ֔וֹ צֹעֶ֖ה בְּרֹ֣ב כֹּח֑וֹ אֲנִ֛י מְדַבֵּ֥ר בִּצְדָקָ֖ה רַ֥ב לְהוֹשִֽׁיעַ׃

‎2 ‏מַדּ֥וּעַ אָדֹ֖ם לִלְבוּשֶׁ֑ךָ וּבְגָדֶ֖יךָ כְּדֹרֵ֥ךְ בְּגַֽת׃

‎3 ‏פּוּרָ֣ה׀ דָּרַ֣כְתִּי לְבַדִּ֗י וּמֵֽעַמִּים֙ אֵֽין־אִ֣ישׁ אִתִּ֔י וְאֶדְרְכֵ֣ם בְּאַפִּ֔י וְאֶרְמְסֵ֖ם בַּחֲמָתִ֑י וְיֵ֤ז נִצְחָם֙ עַל־בְּגָדַ֔י וְכָל־מַלְבּוּשַׁ֖י אֶגְאָֽלְתִּי׃

‎4 ‏כִּ֛י י֥וֹם נָקָ֖ם בְּלִבִּ֑י וּשְׁנַ֥ת גְּאוּלַ֖י בָּֽאָה׃

‎5 ‏וְאַבִּיט֙ וְאֵ֣ין עֹזֵ֔ר וְאֶשְׁתּוֹמֵ֖ם וְאֵ֣ין סוֹמֵ֑ךְ וַתּ֤וֹשַֽׁע לִי֙ זְרֹעִ֔י וַחֲמָתִ֖י הִ֥יא סְמָכָֽתְנִי׃

‎6 ‏וְאָב֤וּס עַמִּים֙ בְּאַפִּ֔י וַאֲשַׁכְּרֵ֖ם בַּחֲמָתִ֑י וְאוֹרִ֥יד לָאָ֖רֶץ נִצְחָֽם׃ ס

‎7 ‏חַֽסְדֵ֨י יְהוָ֤ה׀ אַזְכִּיר֙ תְּהִלֹּ֣ת יְהוָ֔ה כְּעַ֕ל כֹּ֥ל אֲשֶׁר־גְּמָלָ֖נוּ יְהוָ֑ה וְרַב־טוּב֙ לְבֵ֣ית יִשְׂרָאֵ֔ל אֲשֶׁר־גְּמָלָ֥ם כְּֽרַחֲמָ֖יו וּכְרֹ֥ב חֲסָדָֽיו׃

‎8 ‏וַיֹּ֙אמֶר֙ אַךְ־עַמִּ֣י הֵ֔מָּה בָּנִ֖ים לֹ֣א יְשַׁקֵּ֑רוּ וַיְהִ֥י לָהֶ֖ם לְמוֹשִֽׁיעַ׃

‎9 ‏בְּֽכָל־צָרָתָ֣ם׀ לא ל֣וֹ צָ֗ר וּמַלְאַ֤ךְ פָּנָיו֙ הֽוֹשִׁיעָ֔ם בְּאַהֲבָת֥וֹ וּבְחֶמְלָת֖וֹ ה֣וּא גְאָלָ֑ם וַֽיְנַטְּלֵ֥ם וַֽיְנַשְּׂאֵ֖ם כָּל־יְמֵ֥י עוֹלָֽם׃

‎10 ‏וְהֵ֛מָּה מָר֥וּ וְעִצְּב֖וּ אֶת־ר֣וּחַ קָדְשׁ֑וֹ וַיֵּהָפֵ֥ךְ לָהֶ֛ם לְאוֹיֵ֖ב ה֥וּא נִלְחַם־בָּֽם׃

‎11 ‏וַיִּזְכֹּ֥ר יְמֵֽי־עוֹלָ֖ם מֹשֶׁ֣ה עַמּ֑וֹ אַיֵּ֣ה׀ הַֽמַּעֲלֵ֣ם מִיָּ֗ם אֵ֚ת רֹעֵ֣י צֹאנ֔וֹ אַיֵּ֛ה הַשָּׂ֥ם בְּקִרְבּ֖וֹ אֶת־ר֥וּחַ קָדְשֽׁוֹ׃

‎12 ‏מוֹלִיךְ֙ לִימִ֣ין מֹשֶׁ֔ה זְר֖וֹעַ תִּפְאַרְתּ֑וֹ בּ֤וֹקֵֽעַ מַ֙יִם֙ מִפְּנֵיהֶ֔ם לַעֲשׂ֥וֹת ל֖וֹ שֵׁ֥ם עוֹלָֽם׃

‎13 ‏מוֹלִיכָ֖ם בַּתְּהֹמ֑וֹת כַּסּ֥וּס בַּמִּדְבָּ֖ר לֹ֥א יִכָּשֵֽׁלוּ׃

‎14 ‏כַּבְּהֵמָה֙ בַּבִּקְעָ֣ה תֵרֵ֔ד ר֥וּחַ יְהוָ֖ה תְּנִיחֶ֑נּוּ כֵּ֚ן נִהַ֣גְתָּ עַמְּךָ֔ לַעֲשׂ֥וֹת לְךָ֖ שֵׁ֥ם תִּפְאָֽרֶת׃

‎15 ‏הַבֵּ֤ט מִשָּׁמַ֙יִם֙ וּרְאֵ֔ה מִזְּבֻ֥ל קָדְשְׁךָ֖ וְתִפְאַרְתֶּ֑ךָ אַיֵּ֤ה קִנְאָֽתְךָ֙ וּגְב֣וּרֹתֶ֔ךָ הֲמ֥וֹן מֵעֶ֛יךָ וְֽרַחֲמֶ֖יךָ אֵלַ֥י הִתְאַפָּֽקוּ׃

‎16 ‏כִּֽי־אַתָּ֣ה אָבִ֔ינוּ כִּ֤י אַבְרָהָם֙ לֹ֣א יְדָעָ֔נוּ וְיִשְׂרָאֵ֖ל לֹ֣א יַכִּירָ֑נוּ אַתָּ֤ה יְהוָה֙ אָבִ֔ינוּ גֹּאֲלֵ֥נוּ מֵֽעוֹלָ֖ם שְׁמֶֽךָ׃

‎17 ‏לָ֣מָּה תַתְעֵ֤נוּ יְהוָה֙ מִדְּרָכֶ֔יךָ תַּקְשִׁ֥יחַ לִבֵּ֖נוּ מִיִּרְאָתֶ֑ךָ שׁ֚וּב לְמַ֣עַן עֲבָדֶ֔יךָ שִׁבְטֵ֖י נַחֲלָתֶֽךָ׃

‎18 ‏לַמִּצְעָ֕ר יָרְשׁ֖וּ עַם־קָדְשֶׁ֑ךָ צָרֵ֕ינוּ בּוֹסְס֖וּ מִקְדָּשֶֽׁךָ׃

‎19 ‏הָיִ֗ינוּ מֵֽעוֹלָם֙ לֹֽא־מָשַׁ֣לְתָּ בָּ֔ם לֹֽא־נִקְרָ֥א שִׁמְךָ֖ עֲלֵיהֶ֑ם לוּא־קָרַ֤עְתָּ שָׁמַ֙יִם֙ יָרַ֔דְתָּ מִפָּנֶ֖יךָ הָרִ֥ים נָזֹֽלּוּ׃

1 mî-zeh| bā’ mē’ĕḏwōm ḥămûṣ bəḡāḏîm mibāṣərâ zeh hāḏûr biləḇûšwō ṣō‘eh bərōḇ kōḥwō ’ănî məḏabēr biṣəḏāqâ raḇ ləhwōšî‘a:

2 madû‘a ’āḏōm liləḇûšeḵā ûḇəḡāḏeyḵā kəḏōrēḵə bəḡaṯ:

3 pûrâ| dāraḵətî ləḇadî ûmē‘ammîm ’ên-’îš ’itî wə’eḏərəḵēm bə’apî wə’erəməsēm b^aḥămāṯî wəyēz niṣəḥām ‘al-bəḡāḏay wəḵāl-maləbûšay ’eḡə’ālətî:

4 kî ywōm nāqām bəlibî ûšənaṯ gə’ûlay bā’â:

5 wə’abîṭ wə’ên ‘ōzēr wə’ešətwōmēm wə’ên swōmēḵə watwōš^a‘ lî zərō‘î w^aḥămāṯî hî’ səmāḵāṯənî:

6 wə’āḇûs ‘ammîm bə’apî wa’ăšakərēm b^aḥămāṯî wə’wōrîḏ lā’āreṣ niṣəḥām: s

7 ḥasəḏê yəhwâ| ’azəkîr təhillōṯ yəhwâ kə‘al kōl ’ăšer-gəmālānû yəhwâ wəraḇ-ṭûḇ ləḇêṯ yiśərā’ēl ’ăšer-gəmālām kər^aḥămāyw ûḵərōḇ ḥăsāḏāyw:

8 wayyō’mer ’aḵə-‘ammî hēmmâ bānîm lō’ yəšaqqērû wayəhî lâem ləmwōšî‘a:

9 bəḵāl-ṣārāṯām| lō’ lwō ṣār ûmalə’aḵə pānāyw hwōšî‘ām bə’ahăḇāṯwō ûḇəḥeməlāṯwō hû’ ḡə’ālām wayənaṭṭəlēm wayənaśśə’ēm kāl-yəmê ‘wōlām:

10 wəhēmmâ mārû wə‘iṣṣəḇû ’eṯ-rûḥa qāḏəšwō wayyēhāfēḵə lâem lə’wōyēḇ hû’ niləḥam-bām:

11 wayyizəkōr yəmê-‘wōlām mōšeh ‘ammwō ’ayyēh| hamm^a‘ălēm mîyām ’ēṯ rō‘ê ṣō’nwō ’ayyēh haśśām bəqirəbwō ’eṯ-rûḥa qāḏəšwō:

12 mwōlîḵə lîmîn mōšeh zərwō‘a tifə’arətwō bwōqē‘a mayim mipənêhem l^a‘ăśwōṯ lwō šēm ‘wōlām:

13 mwōlîḵām batəhōmwōṯ kassûs bammiḏəbār lō’ yikāšēlû:

14 kabəhēmâ babiqə‘â ṯērēḏ rûḥa yəhwâ tənîḥennû kēn nihaḡətā ‘amməḵā l^a‘ăśwōṯ ləḵā šēm tifə’āreṯ:

15 habēṭ miššāmayim ûrə’ēh mizzəḇul qāḏəšəḵā wəṯifə’arəteḵā ’ayyēh qinə’āṯəḵā ûḡəḇûrōṯeḵā hămwōn mē‘eyḵā wər^aḥămeyḵā ’ēlay hiṯə’apāqû:

16 kî-’atâ ’āḇînû kî ’aḇərâām lō’ yəḏā‘ānû wəyiśərā’ēl lō’ yakîrānû ’atâ yəhwâ ’āḇînû gō’ălēnû mē‘wōlām šəmeḵā:

17 lāmmâ ṯaṯə‘ēnû yəhwâ midərāḵeyḵā taqəšîḥa libēnû mîyirə’āṯeḵā šûḇ ləm^a‘an ‘ăḇāḏeyḵā šiḇəṭê n^aḥălāṯeḵā:

18 lammiṣə‘ār yārəšû ‘am-qāḏəšeḵā ṣārênû bwōsəsû miqədāšeḵā:

19 hāyînû mē‘wōlām lō’-māšalətā bām lō’-niqərā’ šiməḵā ‘ălêhem lû’-qār^a‘ətā šāmayim yāraḏətā mipāneyḵā hārîm nāzōllû: