‎1 ‏וַיֶּאֶסֹ֧ף יְהוֹשֻׁ֛עַ אֶת־כָּל־שִׁבְטֵ֥י יִשְׂרָאֵ֖ל שְׁכֶ֑מָה וַיִּקְרָא֩ לְזִקְנֵ֨י יִשְׂרָאֵ֜ל וּלְרָאשָׁ֗יו וּלְשֹֽׁפְטָיו֙ וּלְשֹׁ֣טְרָ֔יו וַיִּֽתְיַצְּב֖וּ לִפְנֵ֥י הָאֱלֹהִֽים׃

‎2 ‏וַיֹּ֨אמֶר יְהוֹשֻׁ֜עַ אֶל־כָּל־הָעָ֗ם כֹּֽה־אָמַ֣ר יְהוָה֮ אֱלֹהֵ֣י יִשְׂרָאֵל֒ בְּעֵ֣בֶר הַנָּהָ֗ר יָשְׁב֤וּ אֲבֽוֹתֵיכֶם֙ מֵֽעוֹלָ֔ם תֶּ֛רַח אֲבִ֥י אַבְרָהָ֖ם וַאֲבִ֣י נָח֑וֹר וַיַּעַבְד֖וּ אֱלֹהִ֥ים אֲחֵרִֽים׃

‎3 ‏וָ֠אֶקַּח אֶת־אֲבִיכֶ֤ם אֶת־אַבְרָהָם֙ מֵעֵ֣בֶר הַנָּהָ֔ר וָאוֹלֵ֥ךְ אוֹת֖וֹ בְּכָל־אֶ֣רֶץ כְּנָ֑עַן וארב וָאַרְבֶּה֙ אֶת־זַרְע֔וֹ וָֽאֶתֶּן־ל֖וֹ אֶת־יִצְחָֽק׃

‎4 ‏וָאֶתֵּ֣ן לְיִצְחָ֔ק אֶֽת־יַעֲקֹ֖ב וְאֶת־עֵשָׂ֑ו וָאֶתֵּ֨ן לְעֵשָׂ֜ו אֶת־הַ֤ר שֵׂעִיר֙ לָרֶ֣שֶׁת אוֹת֔וֹ וְיַעֲקֹ֥ב וּבָנָ֖יו יָרְד֥וּ מִצְרָֽיִם׃

‎5 ‏וָאֶשְׁלַ֞ח אֶת־מֹשֶׁ֤ה וְאֶֽת־אַהֲרֹן֙ וָאֶגֹּ֣ף אֶת־מִצְרַ֔יִם כַּאֲשֶׁ֥ר עָשִׂ֖יתִי בְּקִרְבּ֑וֹ וְאַחַ֖ר הוֹצֵ֥אתִי אֶתְכֶֽם׃

‎6 ‏וָֽאוֹצִ֤יא אֶת־אֲבֽוֹתֵיכֶם֙ מִמִּצְרַ֔יִם וַתָּבֹ֖אוּ הַיָּ֑מָּה וַיִּרְדְּפ֨וּ מִצְרַ֜יִם אַחֲרֵ֧י אֲבוֹתֵיכֶ֛ם בְּרֶ֥כֶב וּבְפָרָשִׁ֖ים יַם־סֽוּף׃

‎7 ‏וַיִּצְעֲק֣וּ אֶל־יְהוָ֗ה וַיָּ֨שֶׂם מַֽאֲפֵ֜ל בֵּינֵיכֶ֣ם׀ וּבֵ֣ין הַמִּצְרִ֗ים וַיָּבֵ֨א עָלָ֤יו אֶת־הַיָּם֙ וַיְכַסֵּ֔הוּ וַתִּרְאֶ֙ינָה֙ עֵינֵיכֶ֔ם אֵ֥ת אֲשֶׁר־עָשִׂ֖יתִי בְּמִצְרָ֑יִם וַתֵּשְׁב֥וּ בַמִּדְבָּ֖ר יָמִ֥ים רַבִּֽים׃

‎8 ‏ואבאה וָאָבִ֣יא אֶתְכֶ֗ם אֶל־אֶ֤רֶץ הָאֱמֹרִי֙ הַיּוֹשֵׁב֙ בְּעֵ֣בֶר הַיַּרְדֵּ֔ן וַיִּֽלָּחֲמ֖וּ אִתְּכֶ֑ם וָאֶתֵּ֨ן אוֹתָ֤ם בְּיֶדְכֶם֙ וַתִּֽירְשׁ֣וּ אֶת־אַרְצָ֔ם וָאַשְׁמִידֵ֖ם מִפְּנֵיכֶֽם׃

‎9 ‏וַיָּ֨קָם בָּלָ֤ק בֶּן־צִפּוֹר֙ מֶ֣לֶךְ מוֹאָ֔ב וַיִּלָּ֖חֶם בְּיִשְׂרָאֵ֑ל וַיִּשְׁלַ֗ח וַיִּקְרָ֛א לְבִלְעָ֥ם בֶּן־בְּע֖וֹר לְקַלֵּ֥ל אֶתְכֶֽם׃

‎10 ‏וְלֹ֥א אָבִ֖יתִי לִשְׁמֹ֣עַ לְבִלְעָ֑ם וַיְבָ֤רֶךְ בָּרוֹךְ֙ אֶתְכֶ֔ם וָאַצִּ֥ל אֶתְכֶ֖ם מִיָּדֽוֹ׃

‎11 ‏וַתַּעַבְר֣וּ אֶת־הַיַּרְדֵּן֮ וַתָּבֹ֣אוּ אֶל־יְרִיחוֹ֒ וַיִּלָּחֲמ֣וּ בָכֶ֣ם בַּעֲלֵֽי־יְ֠רִיחוֹ הָֽאֱמֹרִ֨י וְהַפְּרִזִּ֜י וְהַֽכְּנַעֲנִ֗י וְהַֽחִתִּי֙ וְהַגִּרְגָּשִׁ֔י הַֽחִוִּ֖י וְהַיְבוּסִ֑י וָאֶתֵּ֥ן אוֹתָ֖ם בְּיֶדְכֶֽם׃

‎12 ‏וָאֶשְׁלַ֤ח לִפְנֵיכֶם֙ אֶת־הַצִּרְעָ֔ה וַתְּגָ֤רֶשׁ אוֹתָם֙ מִפְּנֵיכֶ֔ם שְׁנֵ֖י מַלְכֵ֣י הָאֱמֹרִ֑י לֹ֥א בְחַרְבְּךָ֖ וְלֹ֥א בְקַשְׁתֶּֽךָ׃

‎13 ‏וָאֶתֵּ֨ן לָכֶ֜ם אֶ֣רֶץ׀ אֲשֶׁ֧ר לֹֽא־יָגַ֣עְתָּ בָּ֗הּ וְעָרִים֙ אֲשֶׁ֣ר לֹא־בְנִיתֶ֔ם וַתֵּשְׁב֖וּ בָּהֶ֑ם כְּרָמִ֤ים וְזֵיתִים֙ אֲשֶׁ֣ר לֹֽא־נְטַעְתֶּ֔ם אַתֶּ֖ם אֹכְלִֽים׃

‎14 ‏וְעַתָּ֞ה יְר֧אוּ אֶת־יְהוָ֛ה וְעִבְד֥וּ אֹת֖וֹ בְּתָמִ֣ים וּבֶֽאֱמֶ֑ת וְהָסִ֣ירוּ אֶת־אֱלֹהִ֗ים אֲשֶׁר֩ עָבְד֨וּ אֲבוֹתֵיכֶ֜ם בְּעֵ֤בֶר הַנָּהָר֙ וּבְמִצְרַ֔יִם וְעִבְד֖וּ אֶת־יְהוָֽה׃

‎15 ‏וְאִם֩ רַ֨ע בְּֽעֵינֵיכֶ֜ם לַעֲבֹ֣ד אֶת־יְהוָ֗ה בַּחֲר֨וּ לָכֶ֣ם הַיּוֹם֮ אֶת־מִ֣י תַעֲבֹדוּן֒ אִ֣ם אֶת־אֱלֹהִ֞ים אֲשֶׁר־עָבְד֣וּ אֲבוֹתֵיכֶ֗ם אֲשֶׁר֙ בעבר מֵעֵ֣בֶר^a הַנָּהָ֔ר וְאִם֙ אֶת־אֱלֹהֵ֣י הָאֱמֹרִ֔י אֲשֶׁ֥ר אַתֶּ֖ם יֹשְׁבִ֣ים בְּאַרְצָ֑ם וְאָנֹכִ֣י וּבֵיתִ֔י נַעֲבֹ֖ד אֶת־יְהוָֽה׃ פ

‎16 ‏וַיַּ֤עַן הָעָם֙ וַיֹּ֔אמֶר חָלִ֣ילָה לָּ֔נוּ מֵעֲזֹ֖ב אֶת־יְהוָ֑ה לַעֲבֹ֖ד אֱלֹהִ֥ים אֲחֵרִֽים׃

‎17 ‏כִּ֚י יְהוָ֣ה אֱלֹהֵ֔ינוּ הוּא֩ הַמַּעֲלֶ֨ה אֹתָ֧נוּ וְאֶת־אֲבוֹתֵ֛ינוּ מֵאֶ֥רֶץ מִצְרַ֖יִם מִבֵּ֣ית עֲבָדִ֑ים וַאֲשֶׁ֧ר עָשָׂ֣ה לְעֵינֵ֗ינוּ אֶת־הָאֹת֤וֹת הַגְּדֹלוֹת֙ הָאֵ֔לֶּה וַֽיִּשְׁמְרֵ֗נוּ בְּכָל־הַדֶּ֙רֶךְ֙ אֲשֶׁ֣ר הָלַ֣כְנוּ בָ֔הּ וּבְכֹל֙ הָֽעַמִּ֔ים אֲשֶׁ֥ר עָבַ֖רְנוּ בְּקִרְבָּֽם׃

‎18 ‏וַיְגָ֨רֶשׁ יְהוָ֜ה אֶת־כָּל־הָעַמִּ֗ים וְאֶת־הָאֱמֹרִ֛י יֹשֵׁ֥ב הָאָ֖רֶץ מִפָּנֵ֑ינוּ גַּם־אֲנַ֙חְנוּ֙ נַעֲבֹ֣ד אֶת־יְהוָ֔ה כִּי־ה֖וּא אֱלֹהֵֽינוּ׃ ס

‎19 ‏וַיֹּ֨אמֶר יְהוֹשֻׁ֜עַ אֶל־הָעָ֗ם לֹ֤א תֽוּכְלוּ֙ לַעֲבֹ֣ד אֶת־יְהוָ֔ה כִּֽי־אֱלֹהִ֥ים קְדֹשִׁ֖ים ה֑וּא אֵֽל־קַנּ֣וֹא ה֔וּא לֹֽא־יִשָּׂ֥א לְפִשְׁעֲכֶ֖ם וּלְחַטֹּאותֵיכֶֽם׃

‎20 ‏כִּ֤י תַֽעַזְבוּ֙ אֶת־יְהוָ֔ה וַעֲבַדְתֶּ֖ם אֱלֹהֵ֣י נֵכָ֑ר וְשָׁ֨ב וְהֵרַ֤ע לָכֶם֙ וְכִלָּ֣ה אֶתְכֶ֔ם אַחֲרֵ֖י אֲשֶׁר־הֵיטִ֥יב לָכֶֽם׃

‎21 ‏וַיֹּ֥אמֶר הָעָ֖ם אֶל־יְהוֹשֻׁ֑עַ לֹ֕א כִּ֥י אֶת־יְהוָ֖ה נַעֲבֹֽד׃

‎22 ‏וַיֹּ֨אמֶר יְהוֹשֻׁ֜עַ אֶל־הָעָ֗ם עֵדִ֤ים אַתֶּם֙ בָּכֶ֔ם כִּֽי־אַתֶּ֞ם בְּחַרְתֶּ֥ם לָכֶ֛ם אֶת־יְהוָ֖ה לַעֲבֹ֣ד אוֹת֑וֹ וַיֹּאמְר֖וּ עֵדִֽים׃

‎23 ‏וְעַתָּ֕ה הָסִ֛ירוּ אֶת־אֱלֹהֵ֥י הַנֵּכָ֖ר אֲשֶׁ֣ר בְּקִרְבְּכֶ֑ם וְהַטּוּ֙ אֶת־לְבַבְכֶ֔ם אֶל־יְהוָ֖ה אֱלֹהֵ֥י יִשְׂרָאֵֽל׃

‎24 ‏וַיֹּאמְר֥וּ הָעָ֖ם אֶל־יְהוֹשֻׁ֑עַ אֶת־יְהוָ֤ה אֱלֹהֵ֙ינוּ֙ נַעֲבֹ֔ד וּבְקוֹל֖וֹ נִשְׁמָֽע׃

‎25 ‏וַיִּכְרֹ֨ת יְהוֹשֻׁ֧עַ בְּרִ֛ית לָעָ֖ם בַּיּ֣וֹם הַה֑וּא וַיָּ֥שֶׂם ל֛וֹ חֹ֥ק וּמִשְׁפָּ֖ט בִּשְׁכֶֽם׃

‎26 ‏וַיִּכְתֹּ֤ב יְהוֹשֻׁ֙עַ֙ אֶת־הַדְּבָרִ֣ים הָאֵ֔לֶּה בְּסֵ֖פֶר תּוֹרַ֣ת אֱלֹהִ֑ים וַיִּקַּח֙ אֶ֣בֶן גְּדוֹלָ֔ה וַיְקִימֶ֣הָ שָּׁ֔ם תַּ֚חַת הָֽאַלָּ֔ה אֲשֶׁ֖ר בְּמִקְדַּ֥שׁ יְהוָֽה׃ ס

‎27 ‏וַיֹּ֨אמֶר יְהוֹשֻׁ֜עַ אֶל־כָּל־הָעָ֗ם הִנֵּ֨ה הָאֶ֤בֶן הַזֹּאת֙ תִּֽהְיֶה־בָּ֣נוּ לְעֵדָ֔ה כִּֽי־הִ֣יא שָׁמְעָ֗ה אֵ֚ת כָּל־אִמְרֵ֣י יְהוָ֔ה אֲשֶׁ֥ר דִּבֶּ֖ר עִמָּ֑נוּ וְהָיְתָ֤ה בָכֶם֙ לְעֵדָ֔ה פֶּֽן־תְּכַחֲשׁ֖וּן בֵּאלֹהֵיכֶֽם׃

‎28 ‏וַיְשַׁלַּ֤ח יְהוֹשֻׁ֙עַ֙ אֶת־הָעָ֔ם אִ֖ישׁ לְנַחֲלָתֽוֹ׃ פ

‎29 ‏וַיְהִ֗י אַֽחֲרֵי֙ הַדְּבָרִ֣ים הָאֵ֔לֶּה וַיָּ֛מָת יְהוֹשֻׁ֥עַ בִּן־נ֖וּן עֶ֣בֶד יְהוָ֑ה בֶּן־מֵאָ֥ה וָעֶ֖שֶׂר שָׁנִֽים׃

‎30 ‏וַיִּקְבְּר֤וּ אֹתוֹ֙ בִּגְב֣וּל נַחֲלָת֔וֹ בְּתִמְנַת־סֶ֖רַח אֲשֶׁ֣ר בְּהַר־אֶפְרָ֑יִם מִצְּפ֖וֹן לְהַר־גָּֽעַשׁ׃³

‎31 ‏וַיַּעֲבֹ֤ד יִשְׂרָאֵל֙ אֶת־יְהוָ֔ה כֹּ֖ל יְמֵ֣י יְהוֹשֻׁ֑עַ וְכֹ֣ל׀ יְמֵ֣י הַזְּקֵנִ֗ים אֲשֶׁ֨ר הֶאֱרִ֤יכוּ יָמִים֙ אַחֲרֵ֣י יְהוֹשֻׁ֔עַ וַאֲשֶׁ֣ר יָדְע֗וּ אֵ֚ת כָּל־מַעֲשֵׂ֣ה יְהוָ֔ה אֲשֶׁ֥ר עָשָׂ֖ה לְיִשְׂרָאֵֽל׃

‎32 ‏וְאֶת־עַצְמ֣וֹת י֠וֹסֵף אֲשֶׁר־הֶעֱל֨וּ בְנֵי־יִשְׂרָאֵ֥ל׀ מִמִּצְרַיִם֮ קָבְר֣וּ בִשְׁכֶם֒ בְּחֶלְקַ֣ת הַשָּׂדֶ֗ה אֲשֶׁ֨ר קָנָ֧ה יַעֲקֹ֛ב מֵאֵ֛ת בְּנֵֽי־חֲמ֥וֹר אֲבִֽי־שְׁכֶ֖ם בְּמֵאָ֣ה קְשִׂיטָ֑ה וַיִּֽהְי֥וּ לִבְנֵֽי־יוֹסֵ֖ף לְנַחֲלָֽה׃

‎33 ‏וְאֶלְעָזָ֥ר בֶּֽן־אַהֲרֹ֖ן מֵ֑ת וַיִּקְבְּר֣וּ אֹת֗וֹ בְּגִבְעַת֙ פִּֽינְחָ֣ס בְּנ֔וֹ אֲשֶׁ֥ר נִתַּן־ל֖וֹ בְּהַ֥ר אֶפְרָֽיִם׃

1 wayye’esōf yəhwōšu‘a ’eṯ-kāl-šiḇəṭê yiśərā’ēl šəḵemâ wayyiqərā’ ləziqənê yiśərā’ēl ûlərā’šāyw ûləšōfəṭāyw ûləšōṭərāyw wayyiṯəyaṣṣəḇû lifənê hā’ĕlōhîm:

2 wayyō’mer yəhwōšu‘a ’el-kāl-hā‘ām kōh-’āmar yəhwâ ’ĕlōhê yiśərā’ēl bə‘ēḇer hannâār yāšəḇû ’ăḇwōṯêḵem mē‘wōlām ter^aḥ ’ăḇî ’aḇərâām wa’ăḇî nāḥwōr wayy^a‘aḇəḏû ’ĕlōhîm ’ăḥērîm:

3 wā’eqq^aḥ ’eṯ-’ăḇîḵem ’eṯ-’aḇərâām mē‘ēḇer hannâār wā’wōlēḵə ’wōṯwō bəḵāl-’ereṣ kənā‘an wā’ereḇ wā’arəbeh ’eṯ-zarə‘wō wā’eten-lwō ’eṯ-yiṣəḥāq:

4 wā’etēn ləyiṣəḥāq ’eṯ-y^a‘ăqōḇ wə’eṯ-‘ēśāw wā’etēn lə‘ēśāw ’eṯ-har śē‘îr lārešeṯ ’wōṯwō wəy^a‘ăqōḇ ûḇānāyw yārəḏû miṣərāyim:

5 wā’ešəl^aḥ ’eṯ-mōšeh wə’eṯ-’ahărōn wā’egōf ’eṯ-miṣərayim ka’ăšer ‘āśîṯî bəqirəbwō wə’^aḥar hwōṣē’ṯî ’eṯəḵem:

6 wā’wōṣî’ ’eṯ-’ăḇwōṯêḵem mimmiṣərayim watāḇō’û hayyāmmâ wayyirədəfû miṣərayim ’^aḥărê ’ăḇwōṯêḵem bəreḵeḇ ûḇəfārāšîm yam-sûf:

7 wayyiṣə‘ăqû ’el-yəhwâ wayyāśem ma’ăfēl bênêḵem| ûḇên hammiṣərîm wayyāḇē’ ‘ālāyw ’eṯ-hayyām wayəḵassēhû watirə’eynâ ‘ênêḵem ’ēṯ ’ăšer-‘āśîṯî bəmiṣərāyim watēšəḇû ḇammiḏəbār yāmîm rabîm:

8 wā’āḇi’â wā’āḇî’ ’eṯəḵem ’el-’ereṣ hā’ĕmōrî hayywōšēḇ bə‘ēḇer hayyarədēn wayyillāḥămû ’itəḵem wā’etēn ’wōṯām bəyeḏəḵem watîrəšû ’eṯ-’arəṣām wā’ašəmîḏēm mipənêḵem:

9 wayyāqām bālāq ben-ṣipwōr meleḵə mwō’āḇ wayyillāḥem bəyiśərā’ēl wayyišəl^aḥ wayyiqərā’ ləḇilə‘ām ben-bə‘wōr ləqallēl ’eṯəḵem:

10 wəlō’ ’āḇîṯî lišəmō‘a ləḇilə‘ām wayəḇāreḵə bārwōḵə ’eṯəḵem wā’aṣṣil ’eṯəḵem mîyāḏwō:

11 wat^a‘aḇərû ’eṯ-hayyarədēn watāḇō’û ’el-yərîḥwō wayyillāḥămû ḇāḵem b^a‘ălê-yərîḥwō hā’ĕmōrî wəhapərizzî wəhakən^a‘ănî wəh^aḥitî wəhagirəgāšî h^aḥiûî wəhayəḇûsî wā’etēn ’wōṯām bəyeḏəḵem:

12 wā’ešəl^aḥ lifənêḵem ’eṯ-haṣṣirə‘â watəḡāreš ’wōṯām mipənêḵem šənê maləḵê hā’ĕmōrî lō’ ḇəḥarəbəḵā wəlō’ ḇəqašəteḵā:

13 wā’etēn lāḵem ’ereṣ| ’ăšer lō’-yāḡ^a‘ətā bāh wə‘ārîm ’ăšer lō’-ḇənîṯem watēšəḇû bâem kərāmîm wəzêṯîm ’ăšer lō’-nəṭ^a‘ətem ’atem ’ōḵəlîm:

14 wə‘atâ yər’û ’eṯ-yəhwâ wə‘iḇəḏû ’ōṯwō bəṯāmîm ûḇe’ĕmeṯ wəhāsîrû ’eṯ-’ĕlōhîm ’ăšer ‘āḇəḏû ’ăḇwōṯêḵem bə‘ēḇer hannâār ûḇəmiṣərayim wə‘iḇəḏû ’eṯ-yəhwâ:

15 wə’im r^a‘ bə‘ênêḵem l^a‘ăḇōḏ ’eṯ-yəhwâ b^aḥărû lāḵem hayywōm ’eṯ-mî ṯ^a‘ăḇōḏûn ’im ’eṯ-’ĕlōhîm ’ăšer-‘āḇəḏû ’ăḇwōṯêḵem ’ăšer bə‘ēḇer mē‘ēḇer^a hannâār wə’im ’eṯ-’ĕlōhê hā’ĕmōrî ’ăšer ’atem yōšəḇîm bə’arəṣām wə’ānōḵî ûḇêṯî n^a‘ăḇōḏ ’eṯ-yəhwâ: f

16 wayy^a‘an hā‘ām wayyō’mer ḥālîlâ llānû mē‘ăzōḇ ’eṯ-yəhwâ l^a‘ăḇōḏ ’ĕlōhîm ’ăḥērîm:

17 kî yəhwâ ’ĕlōhênû hû’ hamm^a‘ăleh ’ōṯānû wə’eṯ-’ăḇwōṯênû mē’ereṣ miṣərayim mibêṯ ‘ăḇāḏîm wa’ăšer ‘āśâ lə‘ênênû ’eṯ-hā’ōṯwōṯ hagəḏōlwōṯ hā’ēlleh wayyišəmərēnû bəḵāl-hadereḵə ’ăšer hālaḵənû ḇāh ûḇəḵōl hā‘ammîm ’ăšer ‘āḇarənû bəqirəbām:

18 wayəḡāreš yəhwâ ’eṯ-kāl-hā‘ammîm wə’eṯ-hā’ĕmōrî yōšēḇ hā’āreṣ mipānênû gam-’ăn^aḥənû n^a‘ăḇōḏ ’eṯ-yəhwâ kî-hû’ ’ĕlōhênû: s

19 wayyō’mer yəhwōšu‘a ’el-hā‘ām lō’ ṯûḵəlû l^a‘ăḇōḏ ’eṯ-yəhwâ kî-’ĕlōhîm qəḏōšîm hû’ ’ēl-qannwō’ hû’ lō’-yiśśā’ ləfišə‘ăḵem ûləḥaṭṭō’wṯêḵem:

20 kî ṯ^a‘azəḇû ’eṯ-yəhwâ w^a‘ăḇaḏətem ’ĕlōhê nēḵār wəšāḇ wəhēr^a‘ lāḵem wəḵillâ ’eṯəḵem ’^aḥărê ’ăšer-hêṭîḇ lāḵem:

21 wayyō’mer hā‘ām ’el-yəhwōšu‘a lō’ kî ’eṯ-yəhwâ n^a‘ăḇōḏ:

22 wayyō’mer yəhwōšu‘a ’el-hā‘ām ‘ēḏîm ’atem bāḵem kî-’atem bəḥarətem lāḵem ’eṯ-yəhwâ l^a‘ăḇōḏ ’wōṯwō wayyō’mərû ‘ēḏîm:

23 wə‘atâ hāsîrû ’eṯ-’ĕlōhê hannēḵār ’ăšer bəqirəbəḵem wəhaṭṭû ’eṯ-ləḇaḇəḵem ’el-yəhwâ ’ĕlōhê yiśərā’ēl:

24 wayyō’mərû hā‘ām ’el-yəhwōšu‘a ’eṯ-yəhwâ ’ĕlōhênû n^a‘ăḇōḏ ûḇəqwōlwō nišəmā‘:

25 wayyiḵərōṯ yəhwōšu‘a bərîṯ lā‘ām bayywōm hahû’ wayyāśem lwō ḥōq ûmišəpāṭ bišəḵem:

26 wayyiḵətōḇ yəhwōšu‘a ’eṯ-hadəḇārîm hā’ēlleh bəsēfer twōraṯ ’ĕlōhîm wayyiqq^aḥ ’eḇen gəḏwōlâ wayəqîmehā ššām t^aḥaṯ hā’allâ ’ăšer bəmiqədaš yəhwâ: s

27 wayyō’mer yəhwōšu‘a ’el-kāl-hā‘ām hinnēh hā’eḇen hazzō’ṯ tihəyeh-bānû lə‘ēḏâ kî-hî’ šāmə‘â ’ēṯ kāl-’imərê yəhwâ ’ăšer diber ‘immānû wəhāyəṯâ ḇāḵem lə‘ēḏâ pen-təḵ^aḥăšûn bē’lōhêḵem:

28 wayəšall^aḥ yəhwōšu‘a ’eṯ-hā‘ām ’îš lən^aḥălāṯwō: f

29 wayəhî ’^aḥărê hadəḇārîm hā’ēlleh wayyāmāṯ yəhwōšu‘a bin-nûn ‘eḇeḏ yəhwâ ben-mē’â wā‘eśer šānîm:

30 wayyiqəbərû ’ōṯwō biḡəḇûl n^aḥălāṯwō bəṯimənaṯ-ser^aḥ ’ăšer bəhar-’efərāyim miṣṣəfwōn ləhar-gā‘aš:³

31 wayy^a‘ăḇōḏ yiśərā’ēl ’eṯ-yəhwâ kōl yəmê yəhwōšu‘a wəḵōl| yəmê hazzəqēnîm ’ăšer he’ĕrîḵû yāmîm ’^aḥărê yəhwōšu‘a wa’ăšer yāḏə‘û ’ēṯ kāl-m^a‘ăśēh yəhwâ ’ăšer ‘āśâ ləyiśərā’ēl:

32 wə’eṯ-‘aṣəmwōṯ ywōsēf ’ăšer-he‘ĕlû ḇənê-yiśərā’ēl| mimmiṣərayim qāḇərû ḇišəḵem bəḥeləqaṯ haśśāḏeh ’ăšer qānâ y^a‘ăqōḇ mē’ēṯ bənê-ḥămwōr ’ăḇî-šəḵem bəmē’â qəśîṭâ wayyihəyû liḇənê-ywōsēf lən^aḥălâ:

33 wə’elə‘āzār ben-’ahărōn mēṯ wayyiqəbərû ’ōṯwō bəḡiḇə‘aṯ pînəḥās bənwō ’ăšer nitan-lwō bəhar ’efərāyim: