‎1 ‏וַֽיְהִי֙ בַּשָּׁנָ֣ה הָרְבִיעִ֔ת לִיהוֹיָקִ֥ים בֶּן־יֹאשִׁיָּ֖הוּ מֶ֣לֶךְ יְהוּדָ֑ה הָיָ֞ה הַדָּבָ֤ר הַזֶּה֙ אֶֽל־יִרְמְיָ֔הוּ מֵאֵ֥ת יְהוָ֖ה לֵאמֹֽר׃

‎2 ‏קַח־לְךָ֮ מְגִלַּת־סֵפֶר֒ וְכָתַבְתָּ֣ אֵלֶ֗יהָ אֵ֣ת כָּל־הַדְּבָרִ֞ים אֲשֶׁר־דִּבַּ֧רְתִּי אֵלֶ֛יךָ עַל־יִשְׂרָאֵ֥ל וְעַל־יְהוּדָ֖ה וְעַל־כָּל־הַגּוֹיִ֑ם מִיּ֞וֹם דִּבַּ֤רְתִּי אֵלֶ֙יךָ֙ מִימֵ֣י יֹאשִׁיָּ֔הוּ וְעַ֖ד הַיּ֥וֹם הַזֶּֽה׃

‎3 ‏אוּלַ֤י יִשְׁמְעוּ֙ בֵּ֣ית יְהוּדָ֔ה אֵ֚ת כָּל־הָ֣רָעָ֔ה אֲשֶׁ֛ר אָנֹכִ֥י חֹשֵׁ֖ב לַעֲשׂ֣וֹת לָהֶ֑ם לְמַ֣עַן יָשׁ֗וּבוּ אִ֚ישׁ מִדַּרְכּ֣וֹ הָרָעָ֔ה וְסָלַחְתִּ֥י לַעֲוֹנָ֖ם וּלְחַטָּאתָֽם׃ ס

‎4 ‏וַיִּקְרָ֣א יִרְמְיָ֔הוּ אֶת־בָּר֖וּךְ בֶּן־נֵֽרִיָּ֑ה וַיִּכְתֹּ֨ב בָּר֜וּךְ מִפִּ֣י יִרְמְיָ֗הוּ אֵ֣ת כָּל־דִּבְרֵ֧י יְהוָ֛ה אֲשֶׁר־דִּבֶּ֥ר אֵלָ֖יו עַל־מְגִלַּת־סֵֽפֶר׃

‎5 ‏וַיְצַוֶּ֣ה יִרְמְיָ֔הוּ אֶת־בָּר֖וּךְ לֵאמֹ֑ר אֲנִ֣י עָצ֔וּר לֹ֣א אוּכַ֔ל לָב֖וֹא בֵּ֥ית יְהוָֽה׃

‎6 ‏וּבָאתָ֣ אַתָּ֡ה וְקָרָ֣אתָ בַמְּגִלָּ֣ה אֲשֶׁר־כָּתַֽבְתָּ־מִפִּי֩ אֶת־דִּבְרֵ֨י יְהוָ֜ה בְּאָזְנֵ֥י הָעָ֛ם בֵּ֥ית יְהוָ֖ה בְּי֣וֹם צ֑וֹם וְגַ֨ם בְּאָזְנֵ֧י כָל־יְהוּדָ֛ה הַבָּאִ֥ים מֵעָרֵיהֶ֖ם תִּקְרָאֵֽם׃

‎7 ‏אוּלַ֞י תִּפֹּ֤ל תְּחִנָּתָם֙ לִפְנֵ֣י יְהוָ֔ה וְיָשֻׁ֕בוּ אִ֖ישׁ מִדַּרְכּ֣וֹ הָרָעָ֑ה כִּֽי־גָד֤וֹל הָאַף֙ וְהַ֣חֵמָ֔ה אֲשֶׁר־דִּבֶּ֥ר יְהוָ֖ה אֶל־הָעָ֥ם הַזֶּֽה׃

‎8 ‏וַיַּ֗עַשׂ בָּרוּךְ֙ בֶּן־נֵ֣רִיָּ֔ה כְּכֹ֥ל אֲשֶׁר־צִוָּ֖הוּ יִרְמְיָ֣הוּ הַנָּבִ֑יא לִקְרֹ֥א בַסֵּ֛פֶר דִּבְרֵ֥י יְהוָ֖ה בֵּ֥ית יְהוָֹֽה׃ ס

‎9 ‏וַיְהִ֣י בַשָּׁנָ֣ה הַ֠חֲמִשִׁית לִיהוֹיָקִ֨ים בֶּן־יֹאשִׁיָּ֤הוּ מֶֽלֶךְ־יְהוּדָה֙ בַּחֹ֣דֶשׁ הַתְּשִׁעִ֔י קָרְא֨וּ צ֜וֹם לִפְנֵ֧י יְהוָ֛ה כָּל־הָעָ֖ם בִּירֽוּשָׁלִָ֑ם וְכָל־הָעָ֗ם הַבָּאִ֛ים מֵעָרֵ֥י יְהוּדָ֖ה בִּירוּשָׁלִָֽם׃

‎10 ‏וַיִּקְרָ֨א בָר֥וּךְ בַּסֵּ֛פֶר אֶת־דִּבְרֵ֥י יִרְמְיָ֖הוּ בֵּ֣ית יְהוָ֑ה בְּלִשְׁכַּ֡ת גְּמַרְיָהוּ֩ בֶן־שָׁפָ֨ן הַסֹּפֵ֜ר בֶּחָצֵ֣ר הָעֶלְי֗וֹן פֶּ֣תַח שַׁ֤עַר בֵּית־יְהוָה֙ הֶֽחָדָ֔שׁ בְּאָזְנֵ֖י כָּל־הָעָֽם׃

‎11 ‏וַ֠יִּשְׁמַ֗ע מִכָ֨יְהוּ בֶן־גְּמַרְיָ֧הוּ בֶן־שָׁפָ֛ן אֶת־כָּל־דִּבְרֵ֥י יְהוָ֖ה מֵעַ֥ל הַסֵּֽפֶר׃

‎12 ‏וַיֵּ֤רֶד בֵּית־הַמֶּ֙לֶךְ֙ עַל־לִשְׁכַּ֣ת הַסֹּפֵ֔ר וְהִ֨נֵּה־שָׁ֔ם כָּל־הַשָּׂרִ֖ים יֽוֹשְׁבִ֑ים אֱלִישָׁמָ֣ע הַסֹּפֵ֡ר וּדְלָיָ֣הוּ בֶן־שְׁ֠מַעְיָהוּ וְאֶלְנָתָ֨ן בֶּן־עַכְבּ֜וֹר וּגְמַרְיָ֧הוּ בֶן־שָׁפָ֛ן וְצִדְקִיָּ֥הוּ בֶן־חֲנַנְיָ֖הוּ וְכָל־הַשָּׂרִֽים׃

‎13 ‏וַיַּגֵּ֤ד לָהֶם֙ מִכָ֔יְהוּ אֵ֥ת כָּל־הַדְּבָרִ֖ים אֲשֶׁ֣ר שָׁמֵ֑עַ בִּקְרֹ֥א בָר֛וּךְ בַּסֵּ֖פֶר בְּאָזְנֵ֥י הָעָֽם׃

‎14 ‏וַיִּשְׁלְח֨וּ כָל־הַשָּׂרִ֜ים אֶל־בָּר֗וּךְ אֶת־יְהוּדִ֡י בֶּן־נְ֠תַנְיָהוּ בֶּן־שֶׁלֶמְיָ֣הוּ בֶן־כּוּשִׁי֮ לֵאמֹר֒ הַמְּגִלָּ֗ה אֲשֶׁ֨ר קָרָ֤אתָ בָּהּ֙ בְּאָזְנֵ֣י הָעָ֔ם קָחֶ֥נָּה בְיָדְךָ֖ וָלֵ֑ךְ וַ֠יִּקַּח בָּר֨וּךְ בֶּן־נֵרִיָּ֤הוּ אֶת־הַמְּגִלָּה֙ בְּיָד֔וֹ וַיָּבֹ֖א אֲלֵיהֶֽם׃

‎15 ‏וַיֹּאמְר֣וּ אֵלָ֔יו שֵׁ֣ב נָ֔א וּקְרָאֶ֖נָּה בְּאָזְנֵ֑ינוּ וַיִּקְרָ֥א בָר֖וּךְ בְּאָזְנֵיהֶֽם׃

‎16 ‏וַיְהִ֗י כְּשָׁמְעָם֙ אֶת־כָּל־הַדְּבָרִ֔ים פָּחֲד֖וּ אִ֣ישׁ אֶל־רֵעֵ֑הוּ וַיֹּֽאמְרוּ֙ אֶל־בָּר֔וּךְ הַגֵּ֤יד נַגִּיד֙ לַמֶּ֔לֶךְ אֵ֥ת כָּל־הַדְּבָרִ֖ים הָאֵֽלֶּה׃

‎17 ‏וְאֶ֨ת־בָּר֔וּךְ שָׁאֲל֖וּ לֵאמֹ֑ר הַגֶּד־נָ֣א לָ֔נוּ אֵ֗יךְ כָּתַ֛בְתָּ אֶת־כָּל־הַדְּבָרִ֥ים הָאֵ֖לֶּה מִפִּֽיו׃

‎18 ‏וַיֹּ֤אמֶר לָהֶם֙ בָּר֔וּךְ מִפִּיו֙ יִקְרָ֣א אֵלַ֔י אֵ֥ת כָּל־הַדְּבָרִ֖ים הָאֵ֑לֶּה וַאֲנִ֛י כֹּתֵ֥ב עַל־הַסֵּ֖פֶר בַּדְּיֽוֹ׃ פ

‎19 ‏וַיֹּאמְר֤וּ הַשָּׂרִים֙ אֶל־בָּר֔וּךְ לֵ֥ךְ הִסָּתֵ֖ר אַתָּ֣ה וְיִרְמְיָ֑הוּ וְאִ֥ישׁ אַל־יֵדַ֖ע אֵיפֹ֥ה אַתֶּֽם׃

‎20 ‏וַיָּבֹ֤אוּ אֶל־הַמֶּ֙לֶךְ֙ חָצֵ֔רָה וְאֶת־הַמְּגִלָּ֣ה הִפְקִ֔דוּ בְּלִשְׁכַּ֖ת אֱלִישָׁמָ֣ע הַסֹּפֵ֑ר וַיַּגִּ֙ידוּ֙ בְּאָזְנֵ֣י הַמֶּ֔לֶךְ אֵ֖ת כָּל־הַדְּבָרִֽים׃

‎21 ‏וַיִּשְׁלַ֨ח הַמֶּ֜לֶךְ אֶת־יְהוּדִ֗י לָקַ֙חַת֙ אֶת־הַמְּגִלָּ֔ה וַיִּ֨קָּחֶ֔הָ מִלִּשְׁכַּ֖ת אֱלִישָׁמָ֣ע הַסֹּפֵ֑ר וַיִּקְרָאֶ֤הָ יְהוּדִי֙ בְּאָזְנֵ֣י הַמֶּ֔לֶךְ וּבְאָזְנֵי֙ כָּל־הַשָּׂרִ֔ים הָעֹמְדִ֖ים מֵעַ֥ל הַמֶּֽלֶךְ׃

‎22 ‏וְהַמֶּ֗לֶךְ יוֹשֵׁב֙ בֵּ֣ית הַחֹ֔רֶף בַּחֹ֖דֶשׁ הַתְּשִׁיעִ֑י וְאֶת־הָאָ֖ח לְפָנָ֥יו מְבֹעָֽרֶת׃

‎23 ‏וַיְהִ֣י׀ כִּקְר֣וֹא יְהוּדִ֗י שָׁלֹ֣שׁ דְּלָתוֹת֮ וְאַרְבָּעָה֒ יִֽקְרָעֶ֙הָ֙ בְּתַ֣עַר הַסֹּפֵ֔ר וְהַשְׁלֵ֕ךְ אֶל־הָאֵ֖שׁ אֲשֶׁ֣ר אֶל־הָאָ֑ח עַד־תֹּם֙ כָּל־הַמְּגִלָּ֔ה עַל־הָאֵ֖שׁ אֲשֶׁ֥ר עַל־הָאָֽח׃

‎24 ‏וְלֹ֣א פָחֲד֔וּ וְלֹ֥א קָרְע֖וּ אֶת־בִּגְדֵיהֶ֑ם הַמֶּ֙לֶךְ֙ וְכָל־עֲבָדָ֔יו הַשֹּׁ֣מְעִ֔ים אֵ֥ת כָּל־הַדְּבָרִ֖ים הָאֵֽלֶּה׃

‎25 ‏וְגַם֩ אֶלְנָתָ֨ן וּדְלָיָ֤הוּ וּגְמַרְיָ֙הוּ֙ הִפְגִּ֣עוּ בַמֶּ֔לֶךְ לְבִלְתִּ֥י שְׂרֹ֖ף אֶת־הַמְּגִלָּ֑ה וְלֹ֥א שָׁמַ֖ע אֲלֵיהֶֽם׃

‎26 ‏וַיְצַוֶּ֣ה הַ֠מֶּלֶךְ אֶת־יְרַחְמְאֵ֨ל בֶּן־הַמֶּ֜לֶךְ וְאֶת־שְׂרָיָ֣הוּ בֶן־עַזְרִיאֵ֗ל וְאֶת־שֶֽׁלֶמְיָ֙הוּ֙ בֶּֽן־עַבְדְּאֵ֔ל לָקַ֙חַת֙ אֶת־בָּר֣וּךְ הַסֹּפֵ֔ר וְאֵ֖ת יִרְמְיָ֣הוּ הַנָּבִ֑יא וַיַּסְתִּרֵ֖ם יְהוָֽה׃ ס

‎27 ‏וַיְהִ֥י דְבַר־יְהוָ֖ה אֶֽל־יִרְמְיָ֑הוּ אַחֲרֵ֣י׀ שְׂרֹ֣ף הַמֶּ֗לֶךְ אֶת־הַמְּגִלָּה֙ וְאֶת־הַדְּבָרִ֔ים אֲשֶׁ֨ר כָּתַ֥ב בָּר֛וּךְ מִפִּ֥י יִרְמְיָ֖הוּ לֵאמֹֽר׃

‎28 ‏שׁ֥וּב קַח־לְךָ֖ מְגִלָּ֣ה אַחֶ֑רֶת וּכְתֹ֣ב עָלֶ֗יהָ אֵ֤ת כָּל־הַדְּבָרִים֙ הָרִ֣אשֹׁנִ֔ים אֲשֶׁ֣ר הָי֗וּ עַל־הַמְּגִלָּה֙ הָרִ֣אשֹׁנָ֔ה אֲשֶׁ֥ר שָׂרַ֖ף יְהוֹיָקִ֥ים מֶֽלֶךְ־יְהוּדָֽה׃

‎29 ‏וְעַל־יְהוֹיָקִ֤ים מֶֽלֶךְ־יְהוּדָה֙ תֹּאמַ֔ר כֹּ֖ה אָמַ֣ר יְהוָ֑ה אַ֠תָּה שָׂרַ֜פְתָּ אֶת־הַמְּגִלָּ֤ה הַזֹּאת֙ לֵאמֹ֔ר מַדּוּעַ֩ כָּתַ֨בְתָּ עָלֶ֜יהָ לֵאמֹ֗ר בֹּֽא־יָב֤וֹא מֶֽלֶךְ־בָּבֶל֙ וְהִשְׁחִית֙ אֶת־הָאָ֣רֶץ הַזֹּ֔את וְהִשְׁבִּ֥ית מִמֶּ֖נָּה אָדָ֥ם וּבְהֵמָֽה׃ ס

‎30 ‏לָכֵ֞ן כֹּֽה־אָמַ֣ר יְהוָ֗ה עַל־יְהֽוֹיָקִים֙ מֶ֣לֶךְ יְהוּדָ֔ה לֹא־יִֽהְיֶה־לּ֥וֹ יוֹשֵׁ֖ב עַל־כִּסֵּ֣א דָוִ֑ד וְנִבְלָתוֹ֙ תִּֽהְיֶ֣ה מֻשְׁלֶ֔כֶת לַחֹ֥רֶב בַּיּ֖וֹם וְלַקֶּ֥רַח בַּלָּֽיְלָה׃

‎31 ‏וּפָקַדְתִּ֨י עָלָ֧יו וְעַל־זַרְע֛וֹ וְעַל־עֲבָדָ֖יו אֶת־עֲוֹנָ֑ם וְהֵבֵאתִ֣י עֲ֠לֵיהֶם וְעַל־יֹשְׁבֵ֨י יְרוּשָׁלִַ֜ם וְאֶל־אִ֣ישׁ יְהוּדָ֗ה אֵ֧ת כָּל־הָרָעָ֛ה אֲשֶׁר־דִּבַּ֥רְתִּי אֲלֵיהֶ֖ם וְלֹ֥א שָׁמֵֽעוּ׃ ס

‎32 ‏וְיִרְמְיָ֜הוּ לָקַ֣ח׀ מְגִלָּ֣ה אַחֶ֗רֶת וַֽיִּתְּנָהּ֮ אֶל־בָּר֣וּךְ בֶּן־נֵרִיָּהוּ֮ הַסֹּפֵר֒ וַיִּכְתֹּ֤ב עָלֶ֙יהָ֙ מִפִּ֣י יִרְמְיָ֔הוּ אֵ֚ת כָּל־דִּבְרֵ֣י הַסֵּ֔פֶר אֲשֶׁ֥ר שָׂרַ֛ף יְהוֹיָקִ֥ים מֶֽלֶךְ־יְהוּדָ֖ה בָּאֵ֑שׁ וְע֨וֹד נוֹסַ֧ף עֲלֵיהֶ֛ם דְּבָרִ֥ים רַבִּ֖ים כָּהֵֽמָּה׃ ס

1 wayəhî baššānâ hārəḇî‘iṯ lîhwōyāqîm ben-yō’šîyâû meleḵə yəhûḏâ hāyâ hadāḇār hazzeh ’el-yirəməyâû mē’ēṯ yəhwâ lē’mōr:

2 q^aḥ-ləḵā məḡillaṯ-sēfer wəḵāṯaḇətā ’ēleyhā ’ēṯ kāl-hadəḇārîm ’ăšer-dibarətî ’ēleyḵā ‘al-yiśərā’ēl wə‘al-yəhûḏâ wə‘al-kāl-hagwōyim mîywōm dibarətî ’ēleyḵā mîmê yō’šîyâû wə‘aḏ hayywōm hazzeh:

3 ’ûlay yišəmə‘û bêṯ yəhûḏâ ’ēṯ kāl-hārā‘â ’ăšer ’ānōḵî ḥōšēḇ l^a‘ăśwōṯ lâem ləm^a‘an yāšûḇû ’îš midarəkwō hārā‘â wəsāl^aḥətî l^a‘ăwōnām ûləḥaṭṭā’ṯām: s

4 wayyiqərā’ yirəməyâû ’eṯ-bārûḵə ben-nērîyâ wayyiḵətōḇ bārûḵə mipî yirəməyâû ’ēṯ kāl-diḇərê yəhwâ ’ăšer-diber ’ēlāyw ‘al-məḡillaṯ-sēfer:

5 wayəṣaûeh yirəməyâû ’eṯ-bārûḵə lē’mōr ’ănî ‘āṣûr lō’ ’ûḵal lāḇwō’ bêṯ yəhwâ:

6 ûḇā’ṯā ’atâ wəqārā’ṯā ḇamməḡillâ ’ăšer-kāṯaḇətā-mipî ’eṯ-diḇərê yəhwâ bə’āzənê hā‘ām bêṯ yəhwâ bəywōm ṣwōm wəḡam bə’āzənê ḵāl-yəhûḏâ habā’îm mē‘ārêhem tiqərā’ēm:

7 ’ûlay tipōl təḥinnāṯām lifənê yəhwâ wəyāšuḇû ’îš midarəkwō hārā‘â kî-ḡāḏwōl hā’af wəh^aḥēmâ ’ăšer-diber yəhwâ ’el-hā‘ām hazzeh:

8 wayy^a‘aś bārûḵə ben-nērîyâ kəḵōl ’ăšer-ṣiûâû yirəməyâû hannāḇî’ liqərō’ ḇassēfer diḇərê yəhwâ bêṯ yəhwōâ: s

9 wayəhî ḇaššānâ h^aḥămišîṯ lîhwōyāqîm ben-yō’šîyâû meleḵə-yəhûḏâ b^aḥōḏeš hatəši‘î qārə’û ṣwōm lifənê yəhwâ kāl-hā‘ām bîrûšālāim wəḵāl-hā‘ām habā’îm mē‘ārê yəhûḏâ bîrûšālāim:

10 wayyiqərā’ ḇārûḵə bassēfer ’eṯ-diḇərê yirəməyâû bêṯ yəhwâ bəlišəkaṯ gəmarəyâû ḇen-šāfān hassōfēr beḥāṣēr hā‘eləywōn peṯ^aḥ š^a‘ar bêṯ-yəhwâ heḥāḏāš bə’āzənê kāl-hā‘ām:

11 wayyišəm^a‘ miḵāyəhû ḇen-gəmarəyâû ḇen-šāfān ’eṯ-kāl-diḇərê yəhwâ mē‘al hassēfer:

12 wayyēreḏ bêṯ-hammeleḵə ‘al-lišəkaṯ hassōfēr wəhinnēh-šām kāl-haśśārîm ywōšəḇîm ’ĕlîšāmā‘ hassōfēr ûḏəlāyâû ḇen-šəm^a‘əyâû wə’elənāṯān ben-‘aḵəbwōr ûḡəmarəyâû ḇen-šāfān wəṣiḏəqîyâû ḇen-ḥănanəyâû wəḵāl-haśśārîm:

13 wayyagēḏ lâem miḵāyəhû ’ēṯ kāl-hadəḇārîm ’ăšer šāmē‘a biqərō’ ḇārûḵə bassēfer bə’āzənê hā‘ām:

14 wayyišələḥû ḵāl-haśśārîm ’el-bārûḵə ’eṯ-yəhûḏî ben-nəṯanəyâû ben-šeleməyâû ḇen-kûšî lē’mōr hamməḡillâ ’ăšer qārā’ṯā bāh bə’āzənê hā‘ām qāḥennâ ḇəyāḏəḵā wālēḵə wayyiqq^aḥ bārûḵə ben-nērîyâû ’eṯ-hamməḡillâ bəyāḏwō wayyāḇō’ ’ălêhem:

15 wayyō’mərû ’ēlāyw šēḇ nā’ ûqərā’ennâ bə’āzənênû wayyiqərā’ ḇārûḵə bə’āzənêhem:

16 wayəhî kəšāmə‘ām ’eṯ-kāl-hadəḇārîm pāḥăḏû ’îš ’el-rē‘ēhû wayyō’mərû ’el-bārûḵə hagêḏ nagîḏ lammeleḵə ’ēṯ kāl-hadəḇārîm hā’ēlleh:

17 wə’eṯ-bārûḵə šā’ălû lē’mōr hageḏ-nā’ lānû ’êḵə kāṯaḇətā ’eṯ-kāl-hadəḇārîm hā’ēlleh mipîw:

18 wayyō’mer lâem bārûḵə mipîw yiqərā’ ’ēlay ’ēṯ kāl-hadəḇārîm hā’ēlleh wa’ănî kōṯēḇ ‘al-hassēfer badəywō: f

19 wayyō’mərû haśśārîm ’el-bārûḵə lēḵə hissāṯēr ’atâ wəyirəməyâû wə’îš ’al-yēḏ^a‘ ’êfōh ’atem:

20 wayyāḇō’û ’el-hammeleḵə ḥāṣērâ wə’eṯ-hamməḡillâ hifəqiḏû bəlišəkaṯ ’ĕlîšāmā‘ hassōfēr wayyagîḏû bə’āzənê hammeleḵə ’ēṯ kāl-hadəḇārîm:

21 wayyišəl^aḥ hammeleḵə ’eṯ-yəhûḏî lāq^aḥaṯ ’eṯ-hamməḡillâ wayyiqqāḥehā millišəkaṯ ’ĕlîšāmā‘ hassōfēr wayyiqərā’ehā yəhûḏî bə’āzənê hammeleḵə ûḇə’āzənê kāl-haśśārîm hā‘ōməḏîm mē‘al hammeleḵə:

22 wəhammeleḵə ywōšēḇ bêṯ h^aḥōref b^aḥōḏeš hatəšî‘î wə’eṯ-hā’āḥ ləfānāyw məḇō‘āreṯ:

23 wayəhî| kiqərwō’ yəhûḏî šālōš dəlāṯwōṯ wə’arəbā‘â yiqərā‘ehā bəṯ^a‘ar hassōfēr wəhašəlēḵə ’el-hā’ēš ’ăšer ’el-hā’āḥ ‘aḏ-tōm kāl-hamməḡillâ ‘al-hā’ēš ’ăšer ‘al-hā’āḥ:

24 wəlō’ fāḥăḏû wəlō’ qārə‘û ’eṯ-biḡəḏêhem hammeleḵə wəḵāl-‘ăḇāḏāyw haššōmə‘îm ’ēṯ kāl-hadəḇārîm hā’ēlleh:

25 wəḡam ’elənāṯān ûḏəlāyâû ûḡəmarəyâû hifəgi‘û ḇammeleḵə ləḇilətî śərōf ’eṯ-hamməḡillâ wəlō’ šām^a‘ ’ălêhem:

26 wayəṣaûeh hammeleḵə ’eṯ-yər^aḥəmə’ēl ben-hammeleḵə wə’eṯ-śərāyâû ḇen-‘azərî’ēl wə’eṯ-šeleməyâû ben-‘aḇədə’ēl lāq^aḥaṯ ’eṯ-bārûḵə hassōfēr wə’ēṯ yirəməyâû hannāḇî’ wayyasətirēm yəhwâ: s

27 wayəhî ḏəḇar-yəhwâ ’el-yirəməyâû ’^aḥărê| śərōf hammeleḵə ’eṯ-hamməḡillâ wə’eṯ-hadəḇārîm ’ăšer kāṯaḇ bārûḵə mipî yirəməyâû lē’mōr:

28 šûḇ q^aḥ-ləḵā məḡillâ ’^aḥereṯ ûḵəṯōḇ ‘āleyhā ’ēṯ kāl-hadəḇārîm hāri’šōnîm ’ăšer hāyû ‘al-hamməḡillâ hāri’šōnâ ’ăšer śāraf yəhwōyāqîm meleḵə-yəhûḏâ:

29 wə‘al-yəhwōyāqîm meleḵə-yəhûḏâ tō’mar kōh ’āmar yəhwâ ’atâ śārafətā ’eṯ-hamməḡillâ hazzō’ṯ lē’mōr madû‘a kāṯaḇətā ‘āleyhā lē’mōr bō’-yāḇwō’ meleḵə-bāḇel wəhišəḥîṯ ’eṯ-hā’āreṣ hazzō’ṯ wəhišəbîṯ mimmennâ ’āḏām ûḇəhēmâ: s

30 lāḵēn kōh-’āmar yəhwâ ‘al-yəhwōyāqîm meleḵə yəhûḏâ lō’-yihəyeh-llwō ywōšēḇ ‘al-kissē’ ḏāwiḏ wəniḇəlāṯwō tihəyeh mušəleḵeṯ l^aḥōreḇ bayywōm wəlaqqer^aḥ ballāyəlâ:

31 ûfāqaḏətî ‘ālāyw wə‘al-zarə‘wō wə‘al-‘ăḇāḏāyw ’eṯ-‘ăwōnām wəhēḇē’ṯî ‘ălêhem wə‘al-yōšəḇê yərûšālaim wə’el-’îš yəhûḏâ ’ēṯ kāl-hārā‘â ’ăšer-dibarətî ’ălêhem wəlō’ šāmē‘û: s

32 wəyirəməyâû lāq^aḥ| məḡillâ ’^aḥereṯ wayyitənāh ’el-bārûḵə ben-nērîyâû hassōfēr wayyiḵətōḇ ‘āleyhā mipî yirəməyâû ’ēṯ kāl-diḇərê hassēfer ’ăšer śāraf yəhwōyāqîm meleḵə-yəhûḏâ bā’ēš wə‘wōḏ nwōsaf ‘ălêhem dəḇārîm rabîm kâēmmâ: s